Стоглав. Постановления Стоглавого Собора (1551 год)

Стоглав

Глава 57 . О ТОМ ЖЕ ОТ КНИГ ИУСТИНИЯНА ЦАРЯ. ПРАВИЛО 74.

Аще ли кто божественным тайнам или иным святым службам совершаемым, во святую церковь вшед, или епископу, или причетникам, или инем слугам церковным досаду нанесет, повелеваем убо сего муками казнити и в заточение послати. Аще же и божественныя тайны и службу божественную смятет или совершити возбранит, с мeчeм главу его отсекут. И такова ему отмщати повелеваем не токмо градцким но и воинским властелем.

Глава 58. О ТОМ ЖЕ ОТ РАЗЛИЧНЫХ ТИТ ЕЛЬ ИУСТИНИЯНА ЦАРЯ

Властели же мирстии да не привлачат пред собя чернца или черниц, или девиц, или жен. Якоже имый нечто на кого от мних или от священных девиц и жен, сущих в монастырех, ко епископу места того приступит и возвестит ему, он же с честию мниха или черноризицу, послав игумена, да приведет или посольника, или кого от мирских, и разсмотрив, и судит их. Властель же покушаяйся привести пред ея, таковый лишен власти будет и даст в людцкое сокровище10 литрперепер купно с своим чином. Посланныя же приведшая заключени будут в преграду и подобную казнь да приимут и епископом возбранени будут, ктому таковых на мирских властель судища, не приводити.

Глава 59. О ТОМ ЖЕ ПРАВИЛО 87 ТОГО ЖЕ УСТИНИЯНА ЦАРЯ.

Не творити пакости мнишескому чину: ни черноризцу, ни черноризицы. Никим любо образом не поругатися церковному строению. Се же аще кто дерзнет сотворити, телесную подъимет муку и в заточение предан да будет.

Глава 60 . О ТОМ ЖЕ. СВЯТАГО И РАВНОАПОСТОЛЬНАГО ЦАРЯ КОНСТАНТИНА И СВЯТАГО И РАВНОАПОСТОЛЬНАГО ВЕЛИКАГО КНЯЗЯ ВЛАДИМЕРА КИЕВСКАГО И ВСЕА РУСИИ. ДУХОВНЫЯ ИХ ЗАПОВЕДИ С ВЕЛИКИМ ЗАПРЕЩЕНИЕМ. ЧТО МИРСКИМ СУДЬЯМ СВЯШЕННИЧЕСКАГО И ИНОЧЕСКАГО ЧИНА НЕ СУДИТИ, НИЖЕ НА СУД ПРИВЛАЧИТ И. ИМУЩА СИЦЕ. 

Идеже бо священническое начало и власть и християнскаго благоверия слава от небесного царя уставлена бысть, неправедно есть тамо владели земному царю или судити таковая; сия убо вся яже ради божественного оставления многого и нашим священным писанием утвержена и повелена быша, даже до скончания мира сего, якоже по всей вселенной. И данныя суды святителем и церковныя земля же, и села, и винограды, и озера, и пошлины, сочтавше дахом божественным повелением и нашим царьским повелением уставихом на восточных и на западных, и на полунощных, и южных странах, и во Июдеи же, и во Асии, и во Фракии, во Еладе же, и во Италии, и в различныя же островы нашего веления свобожения возвещаем. И по всей вселенной, идеже православнии князи и властели под нами обладают, нашего свобожения и волю им утвердивше, дахом владели святителем, и никакову мирскому сану смеяти судити или прикоснутся церковным землям и пошлинам. Богом заклинаем и нашим царъским повелением утвержаем, непреложно и соблюдено быти даже до скончания века сего, неприкосновенна и непоколебима пребывати повелеваем. Темже пред живым богом, иже повелевшу нам царствовати, и пред ужасным его судом засвидетельствуем ради царьскаго сего уставления всем нашим приимником и иже по нас царем быти хотящим: всем тысящником и всем сотником, и всем вельможам римским, и всему пространнейшему синклиту полаты нашего царства, и всем иже по всей вселенной бывающим князем и властелем по нас, и всем иже по вселенной людом, иже ныне сущим и потом бывшим, во вся лета и нашему царству подлежащим, и ниединого же от сих преложити или претворити некоторого ради образа, якоже нашим царьским велением в священней и святей римской церкви и всем, иже под нею святителем, по всей вселенной бываема подаваема, да не смеет никтоже порушити или прикоснутися, или которым образом досадити. Аще кто от них Не верует, быти сему безстуж сый, о сих вечным да держим будет осужением и вечным мукам повинен будет, и да имеет тогда сопротивники себе святых божиих властель апостольских Петра и Павла в сем веце и в будущем и в преисподнем аде мучим будет, да изчезнет со дияволом и со всеми нечестивыми. Се же наше повеление царьского писания своими руками утвердивше, честному телу властелина апостольского блаженного Петра своими руками в раку положихом, ту бо апостолу божию обещахом нерушима нам соблюдати, и иже по нас хотящим быти зде, и по вселенней, и православным царем, князем же, и вельможам, соблюдаема быти ради заповедей наших, оставихом, и до скончания миру; и блаженному отцу нашему Силивестру, соборному папе, и, его ради, всем наместником его и зде, и по вселенней святителем господа бога и Спаса нашего Исуса Христа, благонравно поведавше, такоже и инем четырем патриаршеским престолом честных ради апостол и ученик христовых: византийскому, егоже в свое имя преименовахом Андрея, ради апостола, яко много потрудившася к богоразумию тех привести и церкви водрузити православных; такоже и александръскому Маркову приимнику, и антиохийскому Букину настольнику, и ерусалимскому Яковлю брата Господня, и коемуждо во своем пределе подобающую честь подаем, и наши по нас приимницы до века. Такожде всем церквам Христовым и преосвященным митрополитом, и архиепископом, и епископом, и иже по них настольником честь сами даем, и наши приимницы, и велицы сатрапы, якоже служителем божиим и приимником святых апостол, сице творите и соблюдайте, да не предреченной тягости подпадете, и славы божия лишени будете, но дръжите предания, якоже приясте. Бога бойтеся и священную его церковь, и настоятелей ея чтите, да милость божию в сем веце и в будущем получите, и сыново света будете. Царьское подписание сице: «Божество вас да соблюдет во многая лета святейший блаженнии отцы». Дадеся в Риму в день третий каланд априлиевых владыки нашего Флавия Констентина галияном, мужем честнейшим ипат славнейших.

Глава 61. ЗАПОВЕДЬ БААГОЧЕСТИВАГО ЦАРЯ МАНУИЛА КОМНИНА ГРЕЧЕСКАГО НА ОБИДЯЩИХ СВЯТЫЯ ЦЕРКВИ.

Царь же сей Комнин тако узаконив, и писание подав нерушимо. Прихождаху же мнози от строитель церковных, жалующеся на наместников, как обидити хотят церковная стяжания и пошлины. И царь узаконив и написа, глаголя: «Понеже и се ко ушима нашего царства достиже от жалобник церковных, иже повсюду, идеже аще суть церковная стяжания и пошлины, изобидимы от наместников моих или от судий, абие положися нашему царству в небрежении о сем честному храму сему и во всей вселенней, и сущим митрополиям, и архиепископьям, и епископьям, и монастырем, и всем божиим церквам, идеже аще суть, или на восточных странах, по всей вселенней, якоже суть отдана богу, приношения жертвам даже до кончания века, да пребывают моего царства нерушима, писания ради: аще гради, аще села, аще лугове или озера, или торжища и одрины, и люди купленыя в домы церковныя или пошлиною под судом церковным, или винограды, или садове, или что таковое от церковных вещей, якоже еже царьство наше судивше, узаконив положи. И наместницы царства идщего, и несть им кому их посудити; такоже и елика суть едана или куплена в домы церковныя, да суть под судом церковным. Такоже не смеет никтоже посужати и изыскивати коми от моих наместников или судей моих. И аще кто смеяв от наместников или от судей царства моего посудити или проданная к церкви, или даная от кого, или какова отдана будут: всяк бо, иже аще таковое изыскивати или посужати смеет дерзнути, немилостивно сего дом пограблен да будет в дом церковный или судиям, и той сам по вся лета живота своего безчестен да будет, и от сана своего и от служения моего отлучен, яко противяся царству узаконенному, еже благочестие и боголюбезно церквем и монастырем отдавшего. И сего ради мал некаков дар приносящу ми богови от него же тмочисленных дарований от богатоподательные его десница восприимшу ми, сего ради подобает ниже от наместников, ниже от судий царства моего, всяческая церковная или монастырское стяжение, или даное, или купленое, не изыскивати, ниже посужати. Понеже царство мое сия вся отдаде стяжания и пошлины церквам божиим ради имени божия и на славу его, и яко да сохранени будет под крепкою его десницею, овоже прося милости и прощения о их же к богу, яко человек плоть нося, приразихся и согреших, ово же ради помощи от них, иже воини великого царя триста, иже от младаго возраста иноческому житию прилепившихся и во всеоружие одеявшихся святаго Духа, споспешника имети и поборника крепка на видимыя и невидимыя враги. Темже аще убо кто дерзнет или наместник, или судия, или вельможа царства моего, или ради имения, или ради насилия, или ради мзды, или которою хитростию преобидити восхощет церкви божия, аще суть писана во утверженом писании царства моего, преобидит отданная огови и его великой церкви, и якже под областию ея на востоце и на западе всем митрополитом и архиепископом, и епископом, и всем монастырем, идеже аще суть, якоже и преди рехом по всей вселенней, отданые и богу гради, аще села, аще лугове, или езера, торжища и одрины или люди купленыя в домы церковные, или пошлины под судом церковным, или винограды, или садове, или какова суть от церковных притяжания презрит или изобидит, или посуждати начнет: первие же святыя Троицы света и милости, егда предстанет страшному судищу, да не узрит и да отпадет от християнской части, якоже Июда от дванадесятнаго числа апостольска; сему же и клятву приимет, иже от века усопших первородных святых и праведных и богоносных отец».

Глава 62. О ТОМ ЖЕ БЛАГОЧЕСТИВАГО ЦАРЯ ИУСТИНИЯНА ГЛАВА 1 ОТ СВИТКА НОВЫХ ЗАПОВЕДЕЙ.

Великие паче инех иже во человецех два еста дара божия от вышняго дарована человеколюбия: священничество же и царство, ово убо божественным служа, се же человеческими владея и пекийся, от единого и того же начала обоя происходят человеческое украшают житие, якоже ничтоже тако бывает поспешение царству якоже святительска честь, о обоих самех тех присно ecu богови молятся. Аще бо они непорочни будут во всем и к богу имут дерзновение и праведно и подобно украшати начнут преданныя им грады и сущия под ними, будет согласие некое благо все еже добро человечестей даруя жизни. Сему быти веруем, аще священных правил блюдение сохранится, иже праведно похваляеми и покланяеми самовидцы божию слову предаша апостоли и святии отцы сохраниша же и заповедаша.

Глава 63. О ТОМ ЖЕ СВЯТАГО РАВНОАПОСТОЛЬНАГО ВЕЛИКАГО КНЯЗЯ ВЛАДИМЕРА КИЕВСКАГО И ВСЕА РУСИИ. ТАМО БО В СВОЕМ ЦАРЬСКОМ ЗАВЕЩАНИИ И ЗАКОНОПОЛОЖЕНИИ НАПИСАСИЦЕ.

Во имя Отца и Сына и святаго Духа. Се яз князь Владимер, нареченный во святом крещении Василей, сын Святославличь, внук Игорев и блаженныя княгини Ольги, принял есмь святое крещение от греческого царя Констентина и от Фотея патриярха царяградскаго, и приях от него первого митрополита Михаилу Киеву, иже крести всю русскую землю святым крещением. Потом многим летом минувшим создах церковь соборну святыя Богородица десятинную и дах ей десетину изо всего княжения своего, такоже и по всей земли Руской. И со княжения своего княжя суда дах десятую векшу, а ис торгу десятую неделю, а из домов на всякое лето от всякого стада и от всякого живота чюдному Спасу и чюдной Богородицы. Потом разсмотревши греческий намоканон и обретех в нем написано, тоже не подобает судов и тяж князю судити, ни бояром его, ни тиуном его; и яз згадал с своими детьми и со всеми князи, и со всеми бояры: дал есми те суды церквам божиим и отцу своему митрополиту, и всем епископом во всей руской земли, и по сем ненадобе вступатися ни детем моим, ни внучатам, ни всему роду моему до века ни в люди церковныя, ни во все суды их; то все дал есми церкви божий. И по всем градом, и по погостом, и по слободам, и по всей земли, где ни суть хрестьяне, своим бояром и тиуном приказываю судов церковных не судити и наших судов без судей митрополичих не судити десятины для. А се суды церковнии: роспуски и смилное заставание, пошибание, умычки, пролежу мужем и женою о животех, и во племени и в сватовстве поимутся, ведовство, потворы, чародейство, волвование, зелейничество, урекание три бляднею и зелий, и ереичеством, зубояж или сын отца биет, или матерь дщерь биет, ли сноха свекровь, или кто уречется скверными словесы и прилагая отца или матерь, или сестры, или дети, или племя тяжутся о задницы, церковная татба, мертвецов волочат, крест посекут или на стенах трески емлют и с креста, или скот, или птица, или псы без великия нужда введет в церковь, или ино что неподобно церкви содеет; или два друга иметася бити: единого жена другого имет за лоно и роздавит или кого застанут с четвероножною, или кто под овином молится, или во ржи, или под рощением, или у воды; или девка дитя повержет, те все суды церквам божиим даны суть преже нас по законом и по правилом святых отец крестьянскими цари и князи во всех крестьянских людех. И царю, и князю, и бояром, и судиям в те суды нельзе вступатися, и яз такоже то все дал есмь по первых царей уряжению и по вселенских святитель, великих князю, и бояром, и судиям не прощено есть от закона божия вступатися в те суды. Аще же кто преобидит сии устав, таковым непрощеным быти от закона божия: и грех и горе собе наследуют. И своим тиуном приказываю судов церковных не обидити, и с судов градцких давати девять частей князю, а десятую часть святей церкви и отцу нашему митрополиту. Се же убо искони поручено богом им святителем и епископьям их, городцкия и торговыя всякие, и мерила, и спуды, и весы, и ставила. От бога тако искони уставлено есть, и митрополиту блюсти без пакости все то подобает; за все бо то воздати ему слово в день суда великого, якоже и о душах человеческих. А се люди церковныя предани митрополиту по правилом: игумен, игумения, поп, дьякон, попадья, дияконица, и дети их, и кто в клиросе, чернец, черница, проскурница, понамарь, прощеник, баба, вдовица, задушный человек, прикладен, стороник, слепец, хромец, монастыреве больницы, пустынницы, странноприимцы, и кто порты чернеческия свержет, те люди церковныя богадельныя. Митрополит ведает промеж ими суды или обида которая, то общий суд и присуд, и пересуд на полы. Аще кто преступит сия правила, якоже есмь управил по святых отец правилом и первых православных Царей управлению, кто имать преступати правила сия, или дети мои, или внуцы мои, или правнуцы, или князи, или бояре и в котором граде наместник, или судия, или тиун, а имут обидити чмы церковныя или отымати, да будут прокляти в сии век и в будущий от седми соборов святых отец вселенских. И того ради ecu православнии цари гречестии и рустии боятся от бога осужения и от святых апостол и святых отец седми соборов, и поместных, и особь сущих, святых, страшная и грозная и великия предиреченныя заповеди и клятвы. Тамо они святии отцы соборне согласиша и святым Духом запечатлеша: аще кий царь и князь или в каком сану ни буди судит святительский суд или восхитит, или возмет что от святых церквей, или от святых монастырей, возложенных богови в наследие благ вечных от недвижимых вещей, таковии по божественным правилом от бога, аки святотатцы осуждаются, а от святых отец под вечною клятвою да суть.

Страницы: 1 2

Вы можете оставить комментарий, или ссылку на Ваш сайт.

1 комментарий к записи “Стоглав. Постановления Стоглавого Собора (1551 год)”

  1. Akeksei:

    Уложение Собора 1551 г. затронуло главные стороны церковной жизни; в нем были собраны и систематизированы все нормы действующего права Русской церкви. Исходным материалом, кроме канонических источников, послужили Кормчие книги, Устав св. Владимира, постановления Собора 1503 г ., послания митрополитов . . InterpultStudio

Оставить комментарий